剛過去嘅星期六(4日)橫風橫雨，紅色暴雨警告信號仲生效近7小時，但都無阻一班香港會計師健兒比併。香港會計師公會及香港華人會計師公會搞咗個會計界運動嘉年華，有超過40間香港會計團體及機構，合共逾1,000名人士參與，場面非常墟冚。

會計師平時默默地做工，各行各業都有佢哋嘅身影，喺商業世界入面更係守門員。會計師公會會長梁思傑表示，公會一直推動會員積極貢獻社會，同時保持身心健康，希望運動嘉年華可以成為業界嘅年度盛事，為會員提供一個忙裡偷閒嘅機會，一方面show下運動才能，另一方面展示團隊合作精神。

財經事務及庫務局局長許正宇亦有到場觀賽，仲孖住審計署署長林智遠、會計及財務匯報局主席黃天祐等，齊齊耍咗幾式八段錦。許氏希望，會計界朋友承接住呢股團結和諧嘅氣氛，攜手為業界長遠健康發展而努力。